وزیراعظم شہباز شریف نے پیٹرول پر سبسڈی اسکیم کے انتظامات میں حصہ لینے والی ٹیم کی کوششوں کو سراہتے ہوئے وفاقی وزیر برائے ٹیکنالوجی شزا فاطمہ خواجہ کو تمغہ دینے کا اعلان کیا ہے۔ اس کے علاوہ اسکیم کی کامیابی میں کردار ادا کرنے والے دیگر ارکان کو شیلڈز بھی دی جائیں گی۔
وزیراعظم شہباز شریف نے فیول سبسڈی سے متعلق ایک اجلاس سے خطاب کرتے ہوئے کہا کہ اعزازات کا مقصد پوری ٹیم کی محنت کو عوام کے سامنے سراہنا ہے۔ وفاقی حکومت نے صوبوں کے تعاون سے مل کر فیول سبسڈی کے اس اہم منصوبے پر کام کیا۔ اس اسکیم میں مختلف انتظامی مشکلات اور خطرات کا سامنا تھا، لیکن وفاق اور صوبوں نے مشترکہ کوششوں سے اسے آگے بڑھایا۔
وزیراعظم نے اجلاس میں شریک افراد کا شکریہ ادا کیا اور کہا کہ ان کی مسلسل محنت اب نتیجہ دے رہی ہے۔ صوبوں کے وزرائے اعلیٰ کو خطوط لکھ کر ان کے تعاون پر بھی شکریہ ادا کیا گیا ہے۔ صوبائی حکومتوں کی مدد کے بغیر اس منصوبے کو کامیابی سے چلانا مشکل ہوتا۔
شہباز شریف نے کہا کہ فروری میں جنگ شروع ہونے کے بعد بھی اسی نوعیت کی ایک اسکیم متعارف کرائی گئی تھی۔ اس وقت صوبوں نے انتظامی اور مالی سطح پر بھرپور تعاون کیا تھا اور تقریباً 13 لاکھ ٹوکن جاری کیے گئے تھے۔ اس بار بھی خدشہ تھا کہ کہیں منصوبے پر عمل درآمد میں رکاوٹیں پیدا نہ ہوجائیں، تاہم متعلقہ اداروں کی مشترکہ کوششوں سے یہ کام آگے بڑھا۔
وزیراعظم نے بتایا کہ موجودہ فیول سبسڈی اسکیم سے فائدہ اٹھانے والوں کی تعداد ایک کروڑ سے تجاوز کرچکی ہے۔ موٹر سائیکلوں، چنگ چی رکشوں اور 800 سی سی گاڑیوں کے استعمال کرنے والوں سمیت مستحق افراد کو پیٹرول پر ماہانہ 2 ہزار روپے کی سہولت فراہم کی جارہی ہے۔ براہ راست اور بالواسطہ فوائد کو شامل کیا جائے تو اس اسکیم سے مستفید ہونے والوں کی تعداد تقریباً پانچ کروڑ افراد تک پہنچتی ہے۔
وزیراعظم نے اسکیم کے انتظامات میں تعاون کرنے والے وفاقی وزرا اور حکام کا بھی شکریہ ادا کیا۔ ان میں نائب وزیراعظم، وزیر خزانہ، وفاقی وزیر شزا فاطمہ خواجہ، ان کے سیکریٹری اور متعلقہ ٹیم کے علاوہ احسن اقبال، احد چیمہ، عطا اللہ تارڑ، بلال کیانی اور مشرف رسول شامل ہیں۔ انہوں نے آئی ٹی کے شعبے سے وابستہ دیگر افراد کی کوششوں کو بھی سراہا۔
