وزیراعظم شہباز شریف نے کہا ہے کہ کاروباری طبقہ ملکی معیشت میں ریڑھ کی ہڈی کی حیثیت رکھتا ہے، جبکہ پاکستان میں چھوٹے اور درمیانے درجے کے کاروبار (ایس ایم ایز) کو فروغ دینے کی بے پناہ صلاحیت موجود ہے۔
وزیراعظم شہباز شریف کی زیر صدارت سمال اینڈ میڈیم انٹرپرائزز ڈویلپمنٹ اتھارٹی (سمیڈا) کے حوالے سے اہم اجلاس ہوا۔ اجلاس میں سمیڈا میں جاری اصلاحات اور چھوٹے و درمیانے درجے کے کاروبار کے فروغ کے لیے کیے جانے والے اقدامات پر بریفنگ دی گئی۔
وزیراعظم نے ہدایت کی کہ 2028 تک ایس ایم ایز کے لیے قرضوں کی مجموعی مالیت 1.1 ٹریلین روپے سے بڑھا کر 2.2 ٹریلین روپے کی جائے۔ کاروباری افراد کو مالی معاونت تک آسان رسائی دینا ضروری ہے تاکہ نئے کاروبار شروع کرنے اور موجودہ کاروبار کو وسعت دینے کے مواقع بڑھ سکیں۔
شہباز شریف نے پسماندہ علاقوں میں کاروباری سرگرمیوں کے فروغ پر بھی زور دیا۔ ان کا کہنا تھا کہ ایسے علاقوں کے عوام کو کاروباری مواقع فراہم کرنے سے انہیں اپنے علاقوں میں روزگار اور آمدنی کے ذرائع ملیں گے۔ اس سے بڑے شہروں کی جانب نقل مکانی میں بھی کمی لائی جاسکتی ہے اور ملکی ترقی کے عمل میں زیادہ سے زیادہ علاقوں کو شامل کیا جاسکتا ہے۔
وزیراعظم نے سمیڈا کو کاروباری قرضوں کے حصول سے متعلق آگاہی کے لیے جامع لائحہ عمل تیار کرنے کی ہدایت کی۔ انہوں نے کہا کہ درمیانے درجے کے کاروبار کے لیے فیزیبلٹی اسٹڈیز شعبہ جاتی ماہرین سے تیار کرائی جائیں۔ ان مطالعات کو مقامی زبانوں میں بھی دستیاب بنایا جائے تاکہ کاروباری افراد انہیں آسانی سے سمجھ سکیں اور بہتر فیصلے کرسکیں۔
اجلاس کو بتایا گیا کہ سمیڈا کو کاروباری تربیت اور مالی معاونت کے حصول کے لیے مرکزی پلیٹ فارم بنایا جا رہا ہے۔ اس مقصد کے لیے سمیڈا کے دفاتر ملک بھر میں قائم کیے جا رہے ہیں تاکہ مختلف علاقوں کے کاروباری افراد کو اپنے ہی شہروں میں رہنمائی اور سہولت فراہم کی جاسکے۔
کاروباری افراد کی رہنمائی کے لیے مصنوعی ذہانت پر مبنی ہیلپ لائن بھی قائم کی جا رہی ہے۔ اس ہیلپ لائن کے ذریعے شہریوں کو مقامی زبانوں میں کاروبار، تربیت اور مالی معاونت سے متعلق معلومات فراہم کی جائیں گی۔ اس اقدام کا مقصد کاروباری افراد کے لیے سرکاری سہولتوں تک رسائی مزید آسان بنانا ہے۔
اجلاس میں بتایا گیا کہ علی بابا اور سمیڈا کے درمیان مفاہمت کی یادداشت پر دستخط ہوچکے ہیں۔ اس تعاون کے تحت دو سال کے دوران 10 ہزار ایس ایم ایز کو تربیت فراہم کی جائے گی۔ اس تربیت سے کاروباری افراد کو جدید کاروباری طریقوں اور ڈیجیٹل مواقع سے فائدہ اٹھانے میں مدد ملے گی۔
اس کے علاوہ ایس ایم ای ڈیجیٹل پورٹل کو بھی مزید مؤثر اور کاروباری افراد کے لیے آسان بنانے کے لیے اصلاحات جاری ہیں۔ اجلاس کو بتایا گیا کہ ملک میں چھوٹے اور درمیانے درجے کے کاروبار کے فروغ کے لیے مختلف اقدامات پر کام جاری ہے، جبکہ حکومت کا مقصد ایس ایم ایز کو زیادہ سہولتیں فراہم کرکے ملکی معیشت میں ان کے کردار کو مزید مضبوط بنانا ہے۔
