کراچی: پاکستان میں منگل کے روز سونے کی قیمت میں نمایاں کمی ریکارڈ کی گئی، جس کے بعد فی تولہ سونا 4 لاکھ 35 ہزار 436 روپے کا ہوگیا۔
آل پاکستان جیمز اینڈ جیولرز صرافہ ایسوسی ایشن کے جاری کردہ نرخوں کے مطابق فی تولہ سونے کی قیمت میں 3,600 روپے کی کمی ہوئی، جبکہ 10 گرام سونا 3,086 روپے سستا ہوکر 3 لاکھ 73 ہزار 316 روپے پر آگیا۔
اس سے ایک روز قبل پیر کو مقامی مارکیٹ میں سونے کی قیمت میں کوئی تبدیلی نہیں ہوئی تھی اور فی تولہ سونا 4 لاکھ 39 ہزار 36 روپے پر برقرار رہا تھا۔
عالمی مارکیٹ میں بھی سونے کی قیمت میں کمی دیکھی گئی، جہاں فی اونس نرخ 36 ڈالر گر کر 4,129 ڈالر ہوگئے۔ بین الاقوامی مارکیٹ میں قیمتوں میں کمی کا اثر پاکستان کی صرافہ مارکیٹ میں بھی سامنے آیا۔
دوسری جانب چاندی کی قیمت میں کوئی تبدیلی نہیں ہوئی اور فی تولہ چاندی 6,234 روپے پر برقرار رہی۔
