ممبئی: بالی ووڈ کے معروف اداکار عامر خان ایک بار پھر اپنے نئے لک کے باعث سوشل میڈیا پر توجہ کا مرکز بن گئے۔
61 سالہ اداکار کی سفید بالوں اور قدرتی انداز میں سامنے آنے والی تصاویر نے مداحوں کو حیران کرنے کے ساتھ ساتھ ان کی پرانی فلموں اور جوانی کے دنوں کی یاد بھی تازہ کردی۔
سوشل میڈیا پر وائرل ہونے والی تصاویر میں عامر خان سفید بالوں اور چہرے پر عمر کے قدرتی آثار کے ساتھ نظر آئے۔ ان کے اس انداز نے مداحوں کے درمیان مختلف تبصروں کو جنم دیا، تاہم بڑی تعداد میں صارفین نے اداکار کے نیچرل لک کو پسند کیا۔
مداحوں کا کہنا تھا کہ سفید بال، جھریاں اور چہرے میں وقت کے ساتھ آنے والی تبدیلیاں عمر بڑھنے کا فطری عمل ہیں، اس لیے کسی بھی شخص کو اپنی عمر کے قدرتی اثرات کے باعث تنقید کا نشانہ نہیں بنانا چاہیے۔
View this post on Instagram
عامر خان کو بالی ووڈ میں اپنی فلموں کے کرداروں کے لیے ظاہری شکل اور وزن میں نمایاں تبدیلیاں کرنے کے حوالے سے بھی جانا جاتا ہے۔ یہی وجہ ہے کہ ان کا قدرتی اور عمر کے مطابق نیا انداز مداحوں کے لیے خاص توجہ کا باعث بنا۔
سوشل میڈیا صارفین نے عامر خان کے نئے لک کو سراہتے ہوئے کہا کہ مشہور شخصیات بھی عام لوگوں کی طرح عمر کے مختلف مراحل سے گزرتی ہیں اور انہیں اپنی قدرتی شخصیت کے ساتھ نظر آنے کی آزادی ہونی چاہیے۔
عامر خان کے سفید بالوں والا یہ انداز جہاں مداحوں کو ان کے ماضی کے مقبول کرداروں کی یاد دلا رہا ہے، وہیں اس نے عمر بڑھنے کے قدرتی عمل کو قبول کرنے کے حوالے سے بھی سوشل میڈیا پر ایک مثبت گفتگو کو جنم دیا ہے۔
