یوٹیوبر رجب بٹ کی اہلیہ نے بچے کے ماہانہ خرچے اور سامانِ جہیز کی واپسی کے لیے لاہور کی گارڈین کورٹ میں دعویٰ دائر کر دیا۔
لاہور کی فیملی کورٹ میں معروف یوٹیوبر رجب بٹ کے خلاف ان کی اہلیہ نے بچے کے نان نفقہ اور سامانِ جہیز کی واپسی کے لیے باضابطہ قانونی دعویٰ دائر کر دیا ہے۔
درخواست گزار نے عدالت کے سامنے مؤقف اختیار کیا ہے کہ رجب بٹ نے شادی کے محض چند ماہ بعد ہی انہیں زبردستی گھر سے بے دخل کر دیا تھا۔ خاتون کے مطابق ان کا ایک بیٹا کیوان ہے، جس کا نان و نفقہ اور تمام تر اخراجات رجب بٹ نے آج تک ادا نہیں کیے ہیں۔
درخواست گزار نے عدالت کو بتایا کہ یوٹیوبر رجب بٹ کی ماہانہ آمدن کروڑوں روپے میں ہے، لہذا عدالت سے استدعا کی جاتی ہے کہ وہ بچے کا ماہانہ خرچہ مقرر کرے اور سامانِ جہیز کی واپسی کا حکم جاری کرے۔
عدالت نے درخواست کی ابتدائی سماعت کے بعد رجب بٹ کو نوٹس جاری کرتے ہوئے مقررہ تاریخ پر جواب داخل کرنے کی ہدایت کر دی ہے۔
