خیبرپختونخوا میں سیکیورٹی فورسز نے عزم استحکام ویژن کے تحت فتنہ الخوارج کے خلاف کارروائیاں مزید تیز کردی ہیں، شمالی وزیرستان میں انٹیلی جنس کی بنیاد پر کی گئی کارروائی کے دوران 5 خوارج ہلاک جبکہ 2 زخمی ہوگئے۔
سیکیورٹی ذرائع کے مطابق فورسز نے شمالی وزیرستان اور اس سے ملحقہ علاقوں میں فتنہ الخوارج کی موجودگی اور نقل و حرکت سے متعلق حاصل ہونے والی معلومات کی بنیاد پر کارروائی کی۔
ذرائع کا کہنا ہے کہ سیکیورٹی فورسز نے علاقے میں خوارج کے ٹھکانوں کی مسلسل نگرانی کی اور ان کی نقل و حرکت کا سراغ لگانے کے بعد فیصلہ کن کارروائی کی۔
کارروائی کے دوران فتنہ الخوارج کے متعدد ٹھکانوں کو کامیابی سے نشانہ بنایا گیا، جس کے نتیجے میں 5 خوارج ہلاک جبکہ 2 زخمی ہوئے۔
سیکیورٹی ذرائع کے مطابق شمالی وزیرستان اور گردونواح میں فتنہ الخوارج کے خلاف کارروائی کا مقصد دہشت گرد عناصر کے منظم ٹھکانوں اور ان کی سرگرمیوں کا خاتمہ ہے۔
ذرائع کا کہنا ہے کہ سیکیورٹی فورسز کی جانب سے علاقے میں مشتبہ سرگرمیوں اور دہشت گرد عناصر کی نقل و حرکت پر مسلسل نظر رکھی جارہی ہے تاکہ کسی بھی ممکنہ خطرے کا بروقت تدارک کیا جاسکے۔
سیکیورٹی فورسز نے عزم استحکام ویژن کے تحت دہشت گردی کے مکمل خاتمے اور ملک میں پائیدار امن کے قیام کے عزم کا اعادہ کیا ہے۔
حکام کے مطابق دہشت گرد عناصر کے خلاف کارروائیوں کا سلسلہ انٹیلی جنس معلومات کی بنیاد پر جاری رکھا جائے گا تاکہ خیبرپختونخوا سمیت ملک کے مختلف علاقوں میں امن و امان کو مزید مستحکم کیا جاسکے۔
