حکومتی وفد کی ملاقات کے بعد مولانا فضل الرحمان نے پی ٹی آئی سے رابطہ کر کے حکومتی پیشکش پہنچا دی، جس پر تحریک انصاف نے ہنگامی اجلاس طلب کر لیا۔
حکومتی وفد اور مولانا فضل الرحمان کے درمیان ہونے والی ملاقات کے بعد سیاسی سرگرمیاں تیز ہو گئی ہیں اور مولانا فضل الرحمان نے اس معاملے میں متحرک ہو کر حکومتی پیشکش تحریک انصاف تک پہنچا دی ہے۔
ذرائع کے مطابق گزشتہ روز حکومت کی طرف سے رانا ثناء اللہ، اسپیکر قومی اسمبلی ایاز صادق اور طارق فضل چوہدری نے مولانا فضل الرحمان سے ملاقات کی تھی، جس میں ملک کی سیاسی صورتحال پر تبادلہ خیال کیا گیا۔
اس ملاقات کے دوران مولانا نے حکومت کو مشورہ دیا تھا کہ گورنر راج یا ایمرجنسی لگانے کی بجائے تمام معاملات افہام و تفہیم اور مذاکرات کے ذریعے حل کیے جائیں، جس پر حکومت نے مولانا فضل الرحمان کو اس میں اپنا مصالحتی کردار ادا کرنے کا کہا تھا۔
مولانا فضل الرحمان کے اس ٹیلی فونک رابطے کے بعد تحریک انصاف نے فوری طور پر ایک ہنگامی اجلاس طلب کر لیا، جو اس وقت زوم پر جاری ہے اور اس میں تحریک انصاف کی تمام مرکزی قیادت شریک ہے تاکہ آئندہ کے لائحہ عمل اور حکومتی پیشکش پر غور کیا جا سکے۔
