سہیل آفریدی کا کہنا ہے کہ ہمارے مطالبات تسلیم کیے بغیر کوئی دوسرا راستہ نہیں، ہمت ہے تو ایمرجنسی یا گورنر راج کا اعلان کریں، جس کے بعد لوگ ترکی کی مثال دینا بھول جائیں گے۔
وزیراعلیٰ خیبر پختونخوا سہیل آفریدی نے سماجی رابطے کی ویب سائٹ ایکس پر جاری بیان میں کہا ہے کہ ان کے مطالبات تسلیم کرنے کے علاوہ کوئی دوسرا راستہ نہیں ہے۔ ان کا کہنا تھا کہ ایمرجنسی یا گورنر راج کا باضابطہ اعلان کیے بغیر اس نوعیت کے اقدامات کرنا بغاوت کے زمرے میں آتا ہے۔
سہیل آفریدی نے اپنے بیان میں کہا کہ متعلقہ حکام میں ہمت ہے تو ایمرجنسی یا گورنر راج کا اعلان کریں۔ انہوں نے واضح کیا کہ وہ اپنے آئینی اور قانونی مطالبات سے کسی صورت پیچھے نہیں ہٹیں گے۔
وزیراعلیٰ خیبر پختونخوا کے مطابق لانگ مارچ قانون کے مطابق مطالبات پورے ہونے تک جاری رہے گا۔ انہوں نے یہ بھی کہا کہ صوبے میں پالیسی صرف بانی پاکستان تحریک انصاف عمران خان کی چلے گی۔
سہیل آفریدی نے مزید کہا کہ ایمرجنسی یا گورنر راج نافذ کرنے کا اعلان ہونے کے بعد لوگ ترکی کی مثال دینا بھول جائیں گے۔
