وفاقی حکومت کی جانب سے انتظامی امور میں ایک اہم اور بڑا فیصلہ کرتے ہوئے چیف سیکریٹری خیبر پختونخوا شہاب علی شاہ کو ان کے عہدے سے ہٹا دیا گیا ہے۔
وفاقی حکومت نے گریڈ 21 کے پاکستان ایڈمنسٹریٹو سروس کے افسر اور چیف سیکریٹری خیبر پختونخوا شہاب علی شاہ کو ان کے عہدے سے تبدیل کر کے فوری طور پر اسٹیبلشمنٹ ڈویژن رپورٹ کرنے کے احکامات جاری کر دیے ہیں۔
اسٹیبلشمنٹ ڈویژن کی جانب سے اس حوالے سے باضابطہ نوٹیفکیشن جاری کر دیا گیا ہے، جس میں کہا گیا ہے کہ شہاب علی شاہ کو فوری طور پر وفاقی دارالحکومت میں اسٹیبلشمنٹ ڈویژن میں اپنی خدمات رپورٹ کرنے کی ہدایت کی جاتی ہے۔
یہ احکامات پاکستان کے سول سرونٹس ایکٹ 1973 کی دفعہ 10 کے تحت جاری کیے گئے ہیں، جو کہ آئندہ احکامات تک نافذ العمل رہیں گے۔
وفاقی حکومت کے اس جاری کردہ نوٹیفکیشن کو قانونی کارروائی اور باقاعدہ اشاعت کے لیے گزٹ آف پاکستان کو بھی ارسال کر دیا گیا ہے۔
