اسلام آباد پولیس نے لائبہ کیس کے مرکزی ملزم نعمان کو اس کی دو ساتھی خواتین سمیت ایچ 13 کے علاقے سے گرفتار کر لیا ہے جو کرائے کا کمرہ لے کر روپوش تھے۔
اسلام آباد پولیس کے ایس ای او آئی نائن اشتیاق شاہ اور ان کی ٹیم نے کارروائی کے دوران لائبہ کیس کے مرکزی ملزم نعمان کو اسلام آباد کے علاقے ایچ 13 سے گرفتار کر لیا ہے۔ ملزم یہاں ایک کرائے کا کمرہ لے کر روپوش تھا۔
ذرائع کے مطابق ملزم کے موبائل فون سے آن لائن فراڈ اور خواتین کو بلیک میل کرنے کے شواہد برآمد ہوئے ہیں۔ گرفتار ملزم نعمان اس سے پہلے کوئٹہ اینٹی کرپشن میں ملازم تھا، جسے بعد ازاں معطل کر دیا گیا تھا، جبکہ وہ اسلام آباد کی پاک قطر کمپنی میں بھی ملازمت کر چکا ہے۔
پولیس نے اس کارروائی کے دوران ملزم کی دو ساتھی خواتین کو بھی گرفتار کر لیا ہے۔ ابتدائی تحقیقات کے مطابق ملزمان نے مل کر ایک باقاعدہ گینگ بنا رکھا تھا اور ان میں سے ایک خاتون مقدمے میں نامزد ہے۔ ملزم سے مزید تفتیش جاری ہے۔
