اسلام آباد، 12 اکتوبر 2026: عمان کے وزیر خارجہ سید بدر بن حمد بن حمود البوسعیدی 13 سے 14 اکتوبر تک پاکستان کا دو روز بدر بن حمد بن حمود البوسعیدی 13 سے 14 اکتوبر تک پاکستان کا دو روزہ سرکاری دورہ کریں گے۔ وہ نائب وزیراعظم اور وزیر خارجہ اسحاق ڈار کی دعوت پر اسلام آباد پہنچیں گے۔
ترجمان دفتر خارجہ کے مطابق عمانی وزیر خارجہ کے دورے کے دوران پاکستان اور عمان کے مشترکہ وزارتی کمیشن کا آٹھواں اجلاس اسلام آباد میں ہوگا، جس کی مشترکہ صدارت دونوں ممالک کے وزرائے خارجہ اسحاق ڈار اور سید بدر البوسعیدی کریں گے۔
مشترکہ وزارتی کمیشن کا اجلاس پاکستان اور عمان کے درمیان دوطرفہ تعلقات کے مختلف پہلوؤں کا جامع جائزہ لینے اور باہمی تعاون کو مزید فروغ دینے کے لیے اہم پلیٹ فارم فراہم کرے گا۔
اجلاس میں دونوں ممالک کے درمیان تجارت، سرمایہ کاری، معیشت، توانائی، سمندری امور، روزگار، انفرااسٹرکچر اور دیگر شعبوں میں جاری تعاون کا جائزہ لیے جانے کے ساتھ مستقبل کی شراکت داری کے امکانات پر بھی بات چیت ہوگی۔
دونوں وزرائے خارجہ باہمی دلچسپی کے علاقائی اور عالمی امور پر بھی تبادلہ خیال کریں گے، جبکہ پاکستان اور عمان کے درمیان تعاون کے نئے مواقع تلاش کرنے پر بھی بات ہوگی۔
دورے کے دوران عمانی وزیر خارجہ کی وزیراعظم محمد شہباز شریف سے بھی خیرسگالی ملاقات متوقع ہے، جس میں دونوں ممالک کے برادرانہ تعلقات اور باہمی دلچسپی کے امور پر گفتگو ہوگی۔
پاکستان اور عمان کے درمیان دیرینہ برادرانہ تعلقات قائم ہیں۔ دونوں ممالک کے تعلقات باہمی احترام، تاریخی روابط اور مشترکہ مفادات پر مبنی ہیں، جبکہ اعلیٰ سطح پر مسلسل رابطے دوطرفہ شراکت داری کو مزید مضبوط بنانے میں اہم کردار ادا کر رہے ہیں۔
ترجمان دفتر خارجہ کے مطابق سید بدر البوسعیدی کا دورۂ پاکستان دونوں ممالک کے قریبی اور دوستانہ تعلقات کا مظہر ہے اور اس سے مختلف شعبوں میں باہمی مفاد پر مبنی تعاون کو مزید وسعت دینے میں مدد ملے گی۔
عمانی وزیر خارجہ کا دورہ ایسے وقت میں ہو رہا ہے جب پاکستان اور عمان کے درمیان اقتصادی، تجارتی اور سرمایہ کاری کے شعبوں میں تعاون بڑھانے کے امکانات پر توجہ دی جا رہی ہے۔ مشترکہ وزارتی کمیشن کا اجلاس دونوں ممالک کے درمیان جاری تعاون کا جائزہ لینے اور مستقبل کے لیے نئی ترجیحات طے کرنے کا موقع فراہم کرے گا۔
