بلوچستان کے ضلع واشک میں سیکیورٹی فورسز نے انٹیلی جنس معلومات کی بنیاد پر کیے گئے آپریشن کے دوران 5 دہشت گردوں کو ہلاک اور 4 کو زخمی کر دیا۔
بلوچستان میں دہشت گردی اور امن دشمن عناصر کے خلاف جاری آپریشن رد الفتنہ 3 کے تحت سیکیورٹی فورسز نے ضلع واشک کے علاقے پلانتک میں انٹیلی جنس بیسڈ آپریشن کیا۔
سیکیورٹی ذرائع کے مطابق آپریشن کے دوران دہشت گردوں کے ٹھکانوں کو جدید ہتھیاروں سے نشانہ بنایا گیا، جس کے نتیجے میں 5 دہشت گرد ہلاک اور 4 زخمی ہو گئے۔
سیکیورٹی فورسز نے کارروائی کے بعد ہلاک دہشت گردوں کے قبضہ سے بھاری مقدار میں جدید اسلحہ اور گولہ بارود برآمد کر لیا۔
برآمد شدہ سامان میں آر پی جی 7، پانچ گولے، مختلف میگزینز، پانچ جدید ہتھیار، تین موبائل فونز اور دو موٹر سائیکلیں شامل ہیں۔
سیکیورٹی ذرائع کا کہنا ہے کہ ہلاک ہونے والے عناصر علاقے میں بلوچ عوام کو لوٹنے، خوف و ہراس پھیلانے اور قومی انفراسٹرکچر کو نقصان پہنچانے کی متعدد وارداتوں میں ملوث تھے۔
