وزیراعظم سے مکہ ڈیفینس الائنس کے پہلے سیکریٹری جنرل لیفٹیننٹ جنرل ریٹائرڈ نعمان محمود نے ملاقات کی ہے، جس میں سعودی عرب کے دفاع اور علاقائی سلامتی کے لیے پاکستان کے غیر متزلزل عزم کا اعادہ کیا گیا۔
وزیراعظم شہباز شریف سے مکہ ڈیفینس الائنس کے پہلے سیکریٹری جنرل لیفٹیننٹ جنرل ریٹائرڈ نعمان محمود نے اسلام آباد میں ملاقات کی۔ وزیراعظم نے سیکریٹری جنرل کا عہدہ سنبھالنے پر لیفٹیننٹ جنرل ریٹائرڈ نعمان محمود کے لیے نیک خواہشات کا اظہار کیا۔
اس موقع پر وزیراعظم شہباز شریف نے گفتگو کرتے ہوئے کہا کہ مکہ امن معاہدہ خطے میں امن، اتحاد اور استحکام قائم کرنے کے لیے ایک تاریخی سنگِ میل کی حیثیت رکھتا ہے۔
انہوں نے واضح کیا کہ مکہ دفاعی معاہدے کے فریم ورک کے تحت پاکستان سعودی عرب کی خودمختاری، دفاع اور علاقائی سلامتی کے لیے ہر قدم پر شانہ بشانہ کھڑا ہے۔
وزیراعظم نے اس بات پر بھی زور دیا کہ پاکستان سعودی عرب کے اپنے دفاع کے جائز حق کی مکمل حمایت کرتا ہے اور سعودی عرب کی خودمختاری و سلامتی کے تحفظ کے لیے پاکستان کا عزم غیر متزلزل ہے۔
ملاقات کے دوران سیکریٹری جنرل مکہ ڈیفینس الائنس نے وزیراعظم کو الائنس کے فریم ورک کے تحت دونوں ممالک کے درمیان دفاعی اور تزویراتی تعاون کو مزید فروغ دینے کی حکمت عملی سے تفصیل کے ساتھ آگاہ کیا۔
