بہاولنگر میں کیری اور ٹریکٹر ٹرالی میں تصادم کے نتیجے میں خاتون سمیت 3 افراد جاں بحق جبکہ 7 افراد شدید زخمی ہو گئے ہیں۔
بہاولنگر میں ہارون آباد روڈ پر خوفناک سڑک حادثہ پیش آیا، تیز رفتار کیری ڈبہ سامنے سے آنے والی ٹریکٹر ٹرالی سے ٹکرا گیا۔
ریسکیو حکام کے مطابق حادثہ اتنا شدید تھا کہ کیری ڈبہ مکمل طور پر تباہ ہو گیا اور اس میں سوار افراد موقع پر ہی شدید زخمی ہو گئے۔ حادثے کی اطلاع ملتے ہی ریسکیو 1122 کی ٹیموں نے موقع پر پہنچ کر امدادی کارروائیاں شروع کیں۔
حادثے کے نتیجے میں خاتون سمیت 3 افراد جاں بحق ہو گئے جبکہ 2 خواتین سمیت 7 افراد شدید زخمی ہوئے ہیں۔ ریسکیو اہلکاروں نے جاں بحق ہونے والے افراد کی لاشوں اور زخمیوں کو فوری طور پر ڈسٹرکٹ ہیڈ کوارٹر اسپتال منتقل کیا۔
پولیس نے موقع پر پہنچ کر گاڑیوں کو سڑک سے ہٹا کر قانونی کارروائی کا آغاز کر دیا ہے۔ پولیس کے مطابق جاں بحق ہونے والے افراد کی شناخت فیاض، منظور اور کبراں بی بی کے ناموں سے ہوئی ہے۔
