ڈیرہ اسماعیل خان میں مہمانِ خصوصی پر فائرنگ کے واقعے میں جاں بحق افراد کی تعداد 8 ہو گئی ہے۔
ڈیرہ اسماعیل خان کے علاقے ملانہ میں گرلز اسکول کے قریب مسلح افراد کی جانب سے اندھا دھند فائرنگ کے واقعے میں جاں بحق ہونے والے افراد کی تعداد بڑھ کر 8 ہو گئی ہے۔
پولیس ذرائع کے مطابق یہ واقعہ اس وقت پیش آیا، جب ملانہ میں منعقدہ والی بال میچ کے مہمانِ خصوصی اور ان کے ساتھی میچ کے اختتام پر واپس جا رہے تھے۔ فائرنگ کے نتیجے میں جاں بحق ہونے والے افراد میں قدرت، عمر فاروق، شفیق، اجمل اور ارسلان سمیت 8 افراد شامل ہیں۔
سیکیورٹی ذرائع کا کہنا ہے کہ جاں بحق ہونے والے تمام افراد کا تعلق ہیبت خان گروپ سے ہے۔ فائرنگ کے واقعے میں متعدد افراد زخمی بھی ہوئے ہیں، جنہیں فوری طور پر علاج کے لیے ڈسٹرکٹ اسپتال منتقل کر دیا گیا ہے۔
واقعے کے حوالے سے ڈی پی او ضیاء الدین احمد نے بتایا کہ فائرنگ کا یہ واقعہ دیرینہ ذاتی اور سیاسی رنجش کا شاخسانہ ہے۔ والی بال میچ کے بعد واپسی پر دو مخالف گروپوں کا آمنا سامنا ہوا، جس کے بعد دونوں جانب سے فائرنگ شروع ہو گئی۔
پولیس کے مطابق تھانہ یونیورسٹی کی ٹیموں نے واقعے کا مقدمہ درج کر کے تفتیش شروع کر دی ہے اور ملزمان کی گرفتاری کے لیے کارروائی جاری ہے۔
