بیرون ملک ملازمت کا ویزا دلوانے کے نام پر شہری سے 8 لاکھ روپے وصول کرنے والے ملزم کو گرفتار کرلیا گیا۔
وفاقی تحقیقاتی ادارے (ایف آئی اے) کے کمپوزٹ سرکل ساہیوال نے کارروائی کرتے ہوئے بیرون ملک ملازمت کے ویزے کے نام پر شہریوں سے رقم وصول کرنے والے شاہد افضل کو گرفتار کیا۔
ملزم کے خلاف امیگریشن آرڈیننس کی متعلقہ دفعات کے تحت مقدمہ درج کرلیا گیا ہے۔
ایف آئی اے کے مطابق ملزم نے ایک شہری کو قطر کا ویزا دلوانے کا جھانسا دے کر 8 لاکھ روپے وصول کیے تھے۔ بیرون ملک ملازمت کے لیے ویزا اور دیگر سہولیات فراہم کرنے کے نام پر شہری سے رقم لی گئی۔
تحقیقات کے دوران ملزم شاہد افضل کے حوالے سے یہ بھی سامنے آیا کہ وہ اس سے قبل دیگر شہریوں سے بیرون ملک ویزوں کے نام پر بھاری رقوم وصول کرنے میں ملوث رہا ہے۔
ایف آئی اے کی جانب سے گرفتار ملزم سے مزید تفتیش جاری ہے جبکہ کیس میں قانونی کارروائی بھی آگے بڑھائی جا رہی ہے۔
