سوات کے علاقے سخا ڈوب میں محکمہ انسداد دہشت گردی (سی ٹی ڈی) اور پولیس نے خفیہ اطلاع پر مشترکہ کارروائی کرتے ہوئے 3 خوارج کو ہلاک کردیا۔
سی ٹی ڈی کے مطابق کارروائی مصدقہ خفیہ اطلاعات کی بنیاد پر مفتی مظفر عرف خالد گروپ سے تعلق رکھنے والے خوارج کے خلاف کی گئی۔
ہلاک ہونے والوں کی شناخت عبداللہ، منصور علی اور غفران اللہ کے نام سے ہوئی ہے، جن کا تعلق سوات سے تھا۔
سی ٹی ڈی کے مطابق تینوں خوارج رواں سال پیش آنے والے متعدد دہشت گردی کے واقعات اور ٹارگٹ کلنگ میں ملوث رہے اور پولیس کو مطلوب تھے۔
کارروائی کے دوران 3 کلاشنکوفیں، 6 میگزین، بڑی تعداد میں گولیاں اور تھانہ شکردرہ کا نقشہ بھی برآمد کیا گیا۔
سی ٹی ڈی کا کہنا ہے کہ علاقے میں مزید ممکنہ سہولت کاروں اور دہشت گرد عناصر کی موجودگی کے پیش نظر کارروائی کے بعد سرچ اور کلیئرنس کا عمل بھی جاری رکھا گیا۔
دہشت گردوں کے خلاف ایسی کارروائیاں عزمِ استحکام کے وژن کے تحت مقامی آبادی کے تحفظ، ریاستی عملداری کے استحکام اور علاقے میں امن برقرار رکھنے کے لیے سیکیورٹی اداروں کی کوششوں کا حصہ ہیں۔
