پی ٹی آئی خیبر پختونخوا کے سیکریٹری اطلاعات اور سابق صوبائی وزیر شوکت یوسفزئی نے کہا ہے کہ تحریک انصاف دہشت گردی کی حمایت نہیں کرتی اور دہشت گردی کے خلاف جنگ میں پاک فوج کے ساتھ کھڑی ہے۔
نجی ٹی وی کے پروگرام میں گفتگو کرتے ہوئے شوکت یوسفزئی نے کہا کہ تحریک انصاف نے ہمیشہ دہشت گردی کی مذمت کی ہے اور اس کے خلاف کارروائی میں مسلح افواج کی حمایت جماعت کا مؤقف ہے۔
انہوں نے حکومت کی جانب سے دہشت گردی کے خاتمے کے لیے کیے جانے والے اقدامات پر سوال اٹھاتے ہوئے کہا کہ دہشت گردی کے خلاف کارروائی کے بجائے پی ٹی آئی کے خلاف بھی اقدامات کیے جارہے ہیں۔ ان کے مطابق یہ واضح ہونا چاہیے کہ حکومتی اقدامات کا مقصد دہشت گردی کا خاتمہ ہے یا سیاسی جماعت کے خلاف کارروائی۔
شوکت یوسفزئی نے پی ٹی آئی کارکنوں کے خلاف کریک ڈاؤن کا بھی ذکر کیا اور کہا کہ بعض کارروائیوں میں چادر اور چار دیواری کے تقدس کو پامال کیا جارہا ہے۔
انہوں نے کہا کہ اس سے قبل بھی دہشت گردی کے معاملے پر مذاکرات ہوچکے ہیں اور پی ٹی آئی کا مؤقف واضح ہے کہ وہ دہشت گردی کے خلاف جنگ میں مسلح افواج کے ساتھ ہے۔
خیبر پختونخوا پولیس کے بجٹ سے متعلق شوکت یوسفزئی نے کہا کہ صوبائی حکومت نے اپنے بجٹ کا 2 فیصد پولیس کے لیے مختص کیا۔ انہوں نے واضح کیا کہ ایمرجنسی نافذ کرکے پوری جماعت کو دہشت گردوں کی حمایت سے جوڑنا درست نہیں۔
