وفاقی وزارت اطلاعات نے امریکی بحریہ کے پاکستانی سرزمین استعمال کر کے ایران کے خلاف کارروائی کرنے کے دعوؤں کو مسترد کردیا۔
وفاقی وزارت اطلاعات نے امریکی بحریہ کی جانب سے پاکستانی سرزمین استعمال کر کے ایران کے خلاف کارروائی کرنے کے تمام دعوؤں کو مکمل طور پر من گھڑت، جھوٹا اور سستا پروپیگنڈا قرار دے کر مسترد کر دیا۔
وزارت اطلاعات و نشریات کے ترجمان نے اپنے جاری کردہ بیان میں وضاحت کی ہے کہ شمالی امریکہ کے ایک سوشل میڈیا اکاؤنٹ کی جانب سے کیا جانے والا یہ دعویٰ بلکل من گھڑت اور حقیقت سے بعید ہے۔
ترجمان کا کہنا ہے کہ اس قسم کے جھوٹے دعوے اور افواہیں پھیلانا اصل میں ملک میں انتشار اور بدامنی پھیلانے کے ایک وسیع تر ایجنڈے کا حصہ ہے۔
حکومتی ترجمان نے مزید کہا کہ اس طرح کی من گھڑت اور بے بنیاد سوشل میڈیا پوسٹیں کسی بھی سنجیدہ مبصر یا ادارے کی توجہ کے لائق نہیں ہیں۔
وزارت اطلاعات نے واضح کیا کہ اس قسم کی خبروں کو صرف اور صرف پروپیگنڈا قرار دیا جانا چاہیے اور ان کے ساتھ اسی سخت انداز میں نمٹا جانا چاہیے تاکہ ملک دشمن عناصر کے عزائم کو ناکام بنایا جا سکے۔
