بلاول بھٹو زرداری نے سانحہ کارساز کے شہداء کو خراج عقیدت پیش کرتے ہوئے 18 اکتوبر کو ملکی تاریخ کا ایک سیاہ دن قرار دیا ہے۔
پاکستان پیپلز پارٹی کے چیئرمین بلاول بھٹو زرداری نے سانحہ کارساز کی سالگرہ کے موقع پر اپنے پیغام میں شہداء کو زبردست خراج عقیدت پیش کیا ہے۔
انہوں نے کہا کہ 18 اکتوبر ملکی تاریخ کا ایک سیاہ دن ہے، جب محترمہ بینظیر بھٹو شہید کی وطن واپسی پر دہشت گردی کے ذریعے بزدلانہ حملہ کیا گیا۔ جیالوں نے اپنی جانوں کا نذرانہ دے کر اپنی قائد کی حفاظت کی اور جمہوریت اور حق حکمرانی سے اپنی وابستگی کا بے مثال ثبوت دیا۔
بلاول بھٹو زرداری نے کہا کہ شہداء کا لہو اس بات کی گواہی دیتا ہے کہ تشدد اور دہشت گردی کے ذریعے جمہوریت کے عزم کو دبا نہیں جا سکتا۔ سانحہ کارساز کے شہداء کی قربانیاں قومی تاریخ کا روشن باب ہیں جو آنے والی نسلوں کے لیے مشعل راہ بنی رہیں گی۔
ان کا کہنا تھا کہ شہید ذوالفقار علی بھٹو اور شہید بینظیر بھٹو کا مشن آئین کی بالادستی، سماجی انصاف اور خوشحال پاکستان کی تعمیر ہے اور پیپلز پارٹی عوام کے حقوق کی جدوجہد کو ہر قیمت پر جاری رکھے گی۔
