بلوچستان کے اضلاع قلات اور گوادر میں سیکیورٹی فورسز کی کارروائیوں کے دوران 4 دہشت گرد ہلاک ہو گئے، جبکہ آئی ای ڈی دھماکے میں پاک فوج کے میجر شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق 18 اکتوبر کو قلات کے علاقے جتک آباد میں انٹیلیجنس کی بنیاد پر ایک اہم آپریشن کیا گیا۔
اس کارروائی میں سیکیورٹی فورسز نے 4 دہشت گردوں کو ہلاک کر دیا جبکہ ان کے قبضے سے بھاری مقدار میں اسلحہ اور گولہ بارود بھی برآمد کیا گیا۔
دوسری جانب سیکیورٹی فورسز نے گوادر کے علاقے شادی کور میں بھی کلیئرنس آپریشن شروع کیا، جس کے دوران سیکیورٹی فورسز کے دستے کو سڑک کنارے نصب آئی ای ڈی کے ذریعے نشانہ بنایا گیا، جس کے نتیجے میں لاہور سے تعلق رکھنے والے 34 سالہ میجر وجاہت وحید نے جامِ شہادت نوش کیا۔
آئی ایس پی آر کے مطابق سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا ہے اور علاقے میں موجود دیگر شرپسندوں کے خاتمے کے لیے آپریشن جاری ہے۔
سیکیورٹی فورسز نے عزمِ استحکام کے تحت بیرونی سرپرستی میں ہونے والی دہشت گردی کے مکمل خاتمے کے عزم کا اعادہ کیا ہے۔
