لاہور میں ون وے یا ریسنگ کے دوران تیز رفتار گاڑی درخت سے ٹکرا گئی، جس کے نتیجے میں 3 نوجوان جاں بحق اور ایک شدید زخمی ہو گیا۔
عینی شاہدین کے مطابق لاہور کے ڈی ایچ اے فیز 6 میں گاڑی میں سوار نوجوان ریس کھیل رہے تھے کہ اچانک گاڑی تیز رفتاری کے باعث بے قابو ہو کر بیرئیر توڑتی ہوئی سڑک کنارے درخت سے جا ٹکرائی۔
حادثے کے وقت گاڑی میں 4 افراد سوار تھے۔ حادثے کی شدت اتنی زیادہ تھی کہ 25 سالہ عبدالحنان اور 22 سالہ فیضان موقع پر ہی جان کی بازی ہار گئے جبکہ 29 سالہ مصطفیٰ نے اسپتال منتقل کیے جانے کے دوران دم توڑ دیا۔ حادثے میں 22 سالہ حسین شدید زخمی ہوا، جسے فوری طبی امداد کے لیے آئی ایم سی اسپتال منتقل کر دیا گیا۔
ریسکیو حکام نے جاں بحق افراد کی لاشیں قانونی کارروائی کے لیے پولیس کے حوالے کر دی ہیں۔ حادثے میں گاڑی مکمل طور پر تباہ ہو گئی، جسے تھانے منتقل کرنے کا عمل جاری ہے۔
