سعودی عرب نے اپنے سیاحتی ویزا پروگرام کا دائرہ وسیع کرتے ہوئے کوسوو اور گیانا کے شہریوں کو بھی اس سہولت میں شامل کرلیا ہے۔
سعودی وزارت خارجہ کے مطابق دونوں ممالک کے شہری اب سعودی عرب کے سیاحتی ویزا پروگرام سے فائدہ اٹھا سکیں گے۔ اہل افراد الیکٹرانک طریقے سے ویزا حاصل کرنے کے علاوہ مملکت میں داخلے کے بعض مقامات پر پہنچنے کے بعد بھی ویزا حاصل کرنے کے اہل ہوں گے۔
وزارت خارجہ کے مطابق سیاحتی ویزا رکھنے والے افراد مقررہ قوانین اور شرائط کے تحت مختلف مقاصد کے لیے سعودی عرب کا سفر کرسکتے ہیں۔
ان مقاصد میں مختلف تقریبات میں شرکت، عمرہ کی ادائیگی، نمائشوں اور کانفرنسوں میں شرکت کے علاوہ رشتہ داروں اور دوستوں سے ملاقات بھی شامل ہے۔
سعودی وزارت خارجہ نے واضح کیا ہے کہ ویزا کی سہولت متعلقہ ضوابط اور اہلیت کی شرائط کے تابع ہوگی، اس لیے سفر سے قبل درخواست گزاروں کو ویزا کے لیے مقررہ تقاضے مکمل کرنا ہوں گے۔
کوسوو اور گیانا کو سیاحتی ویزا پروگرام میں شامل کیے جانے سے ان ممالک کے شہریوں کے لیے سعودی عرب کا سفر مزید آسان ہوگا۔ اس اقدام کو مملکت کی جانب سے بین الاقوامی سیاحت کے فروغ اور دنیا بھر سے آنے والے سیاحوں کے لیے سفری سہولتوں میں اضافے کی پالیسی کا حصہ قرار دیا گیا ہے۔
سعودی عرب گزشتہ عرصے کے دوران سیاحتی شعبے کو وسعت دینے اور مختلف ممالک کے شہریوں کے لیے ویزا سہولتوں میں اضافہ کرنے پر توجہ دے رہا ہے۔ نئے ممالک کی شمولیت سے سیاحتی ویزا پروگرام کا دائرہ مزید وسیع ہوگیا ہے۔
