امریکی جریدے دی اٹلانٹک نے دعویٰ کیا ہے کہ صدر ڈونلڈ ٹرمپ نومبر کے وسط مدتی انتخابات سے قبل ایران پر حملے کے مختلف آپشنز پر غور کر رہے ہیں۔
امریکی جریدے دی اٹلانٹک نے ملکی حکام کے حوالے سے اپنی رپورٹ میں انکشاف کیا ہے کہ صدر ڈونلڈ ٹرمپ نے تین نومبر کے وسط مدتی انتخابات سے قبل ایران کے خلاف ممکنہ فوجی کارروائی کے آپشنز تیار کرنے کا حکم دیا ہے۔
رپورٹ کے مطابق وائٹ ہاؤس نے پینٹاگون کو ہدایت کی ہے کہ وہ آئندہ چند ہفتوں میں ایرانی اہداف کے خلاف حملے کے منصوبے تیار کرے تاکہ عسکری کامیابی کا تاثر دیا جا سکے۔
انتظامیہ کے حکام کا کہنا ہے کہ اس منصوبہ بندی کا بنیادی مقصد یہ ظاہر کرنا ہے کہ صدر تنازعے میں پیشرفت کر رہے ہیں اور اس کے ساتھ پیٹرول کی قیمتوں میں کمی لانے کے لیے بھی دباؤ کم کیا جا سکے۔ تاہم، اس حملے کا حجم کیا ہوگا اور آیا انتظامیہ واقعی اس پر عمل کرے گی یا نہیں، اس حوالے سے بحث تاحال جاری ہے۔
یاد رہے کہ صدر ٹرمپ بارہا یہ دعویٰ کر چکے ہیں کہ امریکہ اور اسرائیل کی طرف سے ایران کے خلاف شروع کی جانے والی یہ جنگ انتخابات سے بلکل پہلے یا اس کے فورا بعد بہت جلد اپنے انجام کو پہنچ جائے گی۔
