ایرانی وزارت دفاع کا کہنا ہے کہ حالیہ مسلط کردہ جنگ اور بیرونی جارحیت کے باوجود ایران کی مسلح افواج اور دفاعی صنعت نے ہتھیاروں اور جنگی ساز و سامان کی پیداوار میں ڈھائی گنا کا تاریخی اضافہ کر کے اپنی تیاریوں کو مضبوط بنا لیا ہے۔
ایرانی وزارت دفاع کے ترجمان برگیڈیئر جنرل رضا طلائی نیک نے ایک خصوصی انٹرویو کے دوران بتایا کہ بیرونی دشمن کی جانب سے 40 روزہ مسلط کردہ جنگی جارحیت کے بعد، اگلے 7 ماہ میں ملک کی دفاعی پیداوار میں جنگ سے پہلے کی مدت کے مقابلے میں ڈھائی گنا اضافہ حاصل کیا گیا ہے۔
ترجمان نے بتایا کہ یہ کامیابی متبادل اور محفوظ پیداواری سائٹس کے قیام اور ملک کی تقریباً 9 ہزار سے زائد نجی نالج بیسڈ کمپنیوں کو دفاعی سپلائی چین کا حصہ بنانے سے ممکن ہوئی ہے، جبکہ ملک کے اسٹریٹجک دفاعی ذخائر استعمال کی سطح سے کہیں زیادہ اعلیٰ مقام پر موجود ہیں۔
برگیڈیئر جنرل رضا طلائی نیک نے سابق وزیر دفاع شہید میجر جنرل عزیز نصیر زادہ کی خدمات کو خراج تحسین پیش کرتے ہوئے کہا کہ ان کی قیادت میں وزارت دفاع کے نالج بیسڈ نیٹ ورک میں 35 فیصد اضافہ ہوا اور پہلے ہی سال میں پیداواری صلاحیت 80 فیصد تک بڑھی۔
ترجمان کے مطابق ایرانی سسٹمز اور مقامی ٹیکنالوجی کے باعث دشمن کے مہنگے ترین غیر ملکی اسلحے کی مقابلے میں ایرانی دفاعی اخراجات ایک سے 50 گنا تک کم رہے ہیں۔
انہوں نے بتایا کہ رمضان کی طویل جنگ کے دوران مقامی دفاعی سسٹمز نے دشمن کے 20 گنا سے زائد ڈرونز کو تباہ کیا، جس کی وجہ سے دشمن کی بحری قوتوں کو پیچھے ہٹنے پر مجبور ہونا پڑا ہے۔
انہوں نے یہ بھی بتایا کہ نئے نامزد وزیر دفاع انجینئر مہرداد اخلاقی کی زیر نگرانی اب خلائی، میزائل اور ڈرون ٹیکنالوجی پر مبنی 50 نجی مشترکہ پروجیکٹس پر بھی تیزی سے کام جاری ہے۔
