حصار کا شکار غزہ میں اسرائیلی افواج کی سفاکانہ بمباری اور مظالم کا سلسلہ بدستور جاری ہے، تازہ فضائی اور زمینی حملوں میں مزید 7 فلسطینی شہید ہو گئے۔
غزہ کے طبی ذرائع اور عینی شاہدین کے مطابق اسرائیلی جیٹ طیاروں اور آرٹلری نے غزہ کے متعدد حصوں پر وحشیانہ بمباری کی۔ ان حملوں میں 7 فلسطینی جام شہادت نوش کر گئے، جبکہ 12 سے زائد شدید زخمی ہوئے، جنہیں تشویشناک حالت میں اسپتالوں میں منتقل کیا گیا۔ طبی حکام کا کہنا ہے کہ شہداء میں ایک معصوم بچہ اور ایک خاتون بھی شامل ہیں۔
اسرائیلی افواج نے غزہ شہر کے گنجان آباد علاقوں بشمول تل الهوا، التوام، عامر پروجیکٹ اور شمال مغربی علاقے السودانیہ کو فضائی حملوں کا نشانہ بنایا۔
اس کے علاوہ رفح کے شمال مغرب میں واقع المواصی کے خیمہ جلاوطن کیمپوں، خان یونس کے بنس سہیلہ اور شمال مشرقی حصوں پر بھی شدید گولہ باری کی گئی۔
اطلاعات کے مطابق 7 شہداء میں سے 6 فلسطینی غزہ کے مختلف حصوں میں کیے جانے والے براہ راست حملوں میں شہید ہوئے، جس سے علاقے میں انسانی بحران اور خوف و ہراس کی فضا مزید سنگین ہو گئی ہے۔
