یمنی فوج نے دعویٰ کیا ہے کہ 24 گھنٹوں کے دوران حوثی جنگجوؤں کے خلاف تقریباً 2 ہزار کارروائیاں کیں، جن میں ایک ہزار سے زائد زائد جنگجوؤں کو ہلاک کردیا۔
یمن کی بین الاقوامی طور پر تسلیم شدہ حکومت کی مسلح افواج نے دعویٰ کیا ہے کہ ملک کے مختلف محاذوں پر حوثی جنگجوؤں کے خلاف بڑے پیمانے پر کارروائیاں کی گئی ہیں، جن کے دوران ایک ہزار 150 سے زائد جنگجو ہلاک ہوئے۔
یمنی حکومتی افواج کے ترجمان کرنل ماجد عبداللہ النزیلی نے بتایا کہ یمن کی صبح کے نام سے جاری فوجی کارروائی کے تحت گزشتہ 24 گھنٹوں کے دوران ملک بھر میں تقریباً 2 ہزار کارروائیاں کی گئیں۔ حملوں میں مشرقی، مغربی اور جنوب مغربی محاذوں کو نشانہ بنایا گیا۔
فوجی ترجمان نے دعویٰ کیا کہ ان کارروائیوں کے دوران حوثی جنگجوؤں کے اسلحے اور گولہ بارود کے ذخائر تباہ کیے گئے۔ اس کے علاوہ حوثی گروہ کی زیر استعمال کم از کم 180 جنگی، نقل و حمل اور رسد فراہم کرنے والی گاڑیاں بھی تباہ کر دی گئیں۔
کرنل ماجد عبداللہ النزیلی کے مطابق زمینی افواج نے اپنی پیش قدمی جاری رکھی اور مختلف محاذوں پر حملوں کا سلسلہ برقرار رکھا۔ اہم پہاڑی مقامات اور مختلف علاقوں پر کنٹرول حاصل کرلیا گیا ہے۔
