یمنی مسلح افواج نے جاری فجرِ یمن آپریشن کے تحت حوثی ملیشیا کے خلاف وسیع پیمانے پر کارروائیاں کرتے ہوئے ان کے عسکری ڈھانچے اور سپلائی لائنوں کو تباہ کرنے کا دعویٰ کیا ہے۔
یمنی مسلح افواج کے سرکاری ترجمان کرنل ماجد النزیلی نے بیان میں بتایا کہ فجرِ یمن آپریشن کے تحت حوثی ملیشیا کے عسکری اہداف کو نشانہ بنانے کے لیے جنگی طیاروں، ڈرونز، فیلڈ آرٹلری، راکٹ لانچرز اور اسنائپر یونٹس کا آزادانہ اور مؤثر استعمال کیا گیا۔ اس دوران دشمن کے ٹھکانوں اور دفاعی لائنوں پر ایک ہزار 879 کے قریب انتہائی شدید اور براہ راست حملے کیے گئے۔
ترجمان کے مطابق ابتدائی تخمینوں کے تحت ان شدید کارروائیوں کے نتیجے میں حوثی ملیشیا کے تقریباً 950 جنگجو ہلاک ہو چکے ہیں، جبکہ ان کی 380 کے قریب عسکری گاڑیاں، ترسیلی وسائل، گاڑیاں اور جنگی آلات مکمل طور پر تباہ اور ناکارہ بنا دیے گئے ہیں۔
بیان میں بتایا گیا کہ ان حملوں میں دشمن کے کمانڈ اینڈ کنٹرول سنٹرز، ہتھیاروں و بارود کے گوداموں، قلعہ بند تنصیبات، آرٹلری پوزیشنز اور کمک بھیجنے کے راستوں کو خاص طور پر نشانہ بنایا گیا، جس سے حوثی صفوں میں شدید افراتفری اور مواصلاتی نظام درہم برہم ہو گیا۔
کرنل ماجد النزیلی نے مزید کہا کہ تعز کے محاذوں پر کی گئی فضائی کارروائیوں نے حوثیوں کی تمام تازہ دم کمک کو تباہ کر دیا اور ان کے جنگجوؤں کے اجتماعات کو منتشر کر دیا۔
انہوں نے کہا کہ تمام عسکری کارروائیاں عالمی انسانی قوانین اور شہریوں کے تحفظ کے بنیادی اصولوں کو مدنظر رکھتے ہوئے انجام دی گئی ہیں۔
ان کا کہنا تھا کہ فی الوقت یمنی ملٹری انجینئرنگ کے یونٹس حوثیوں سے واگزار کرائے گئے علاقوں کو بارودی سرنگوں اور دھماکہ خیز مواد سے پاک کر رہے ہیں تاکہ شہری محفوظ طریقے سے اپنے گھروں کو لوٹ سکیں۔ دریں اثناء یمن کے علاقوں الحدیدہ اور عمران میں بھی نئے فضائی حملوں کی اطلاعات موصول ہوئی ہیں۔
