حوثی ملیشیا نے تنبیہ کی ہے کہ اگر امریکی صدر نے سعودی فورسز کے ساتھ مل کر یمن پر بمباری یا عسکری کارروائیوں میں حصہ لیا تو خطے میں تمام امریکی مفادات پر فوری اور دردناک جوابی حملے کیے جائیں گے۔
بین الاقوامی خبر رساں ادارے سے گفتگو کرتے ہوئے حوثی سیاسی بیورو کے سینئر رکن محمد البخیتی نے کہا کہ اگر امریکا، یمن اور اس کی عوام کے خلاف کی جانے والی کسی بھی عسکری جارحیت کا حصہ بنتا ہے تو ہم اس کا جواب دینے کے فیصلے پر لمحہ بھر کے لیے بھی سوچ و بچار یا تاخیر نہیں کریں گے۔
انہوں نے دھمکی دی کہ حملوں کے جواب میں پورے مشرق وسطیٰ میں پھیلے ہوئے امریکی فوجی اڈوں، تنصیبات اور تجارتی مفادات پر انتہائی فوری اور ناقابل برداشت حد تک دردناک حملے کیے جائیں گے۔
محمد البخیتی نے سعودی عرب کی تیل کی تمام قومی و عالمی تنصیبات، آئل فیلڈز اور ہوائی اڈوں پر کام کرنے والے تمام ملکی اور غیر ملکی ملازمین اور محنت کشوں کو خبردار کیا کہ وہ ان سائٹس اور حساس مقامات سے فوراً دور ہو جائیں، کیونکہ یہ تمام تنصیبات اب حوثی فورسز کے لیے قانونی اور کھلے اہداف بن چکی ہیں۔
