نیٹو کے اعلیٰ عسکری کمانڈر نے روس کو خبردار کیا ہے کہ اگر اتحادی سرزمین پر حملہ کیا تو نیٹو اس کی جنگی صلاحیتوں اور تمام حامی بنیادی ڈھانچے کو مکمل طور پر تباہ کر دے گا۔
پولینڈ کے دارالحکومت وارسا میں جاری سیکیورٹی فورم سے خطاب کرتے ہوئے امریکی فضائیہ کے جنرل اور نیٹو کے یورپ میں سپریم الائیڈ کمانڈر الیکسس گرنکیوچ نے کہا کہ اگر کوئی دشمن ہم پر حملہ کرنے کی حماقت کرے گا تو ہم اس کے خلاف پوری طاقت سے لڑیں گے۔
انہوں نے عزم ظاہر کیا کہ نیٹو نہ صرف حملہ آور فورس کو روکے گا بلکہ ہر اس چیز کو مٹی میں ملا دے گا، جو اس طاقت کو سہارا اور کنٹرول فراہم کرتی ہے۔
جنرل گرنکیوچ نے اپنے تین نکاتی اسٹریٹجک پلان کا ذکر کرتے ہوئے کہا کہ اس میں دشمن کی فوج کو روکنا، اسے کمزور کرنا اور پھر اس کے جنگی نظام کو توڑ دینا شامل ہے۔
انہوں نے واضح کیا کہ نیٹو ایک دفاعی اتحاد ہے لیکن اپنے 32 اراکین میں سے کسی پر بھی جارحیت کی صورت میں وہ فیصلہ کن اور تباہ کن جواب دینے کے لیے پوری طرح تیار ہے۔
