ایرانی وزیرِ خارجہ کا کہنا ہے کہ نیتن یاہو جیل جانے سے بچنے کے لیے امریکہ کو ایران کے خلاف ایک اور جنگ میں دھکیل رہے ہیں۔
ایران کے وزیرِ خارجہ عباس عراقچی نے سوشل میڈیا پلیٹ فارم ایکس پر جاری اپنے بیان میں اسرائیلی وزیرِ اعظم نیتن یاہو پر شدید تنقید کی ہے۔
انہوں نے کہا کہ نیتن یایو اپنی داخلی سیاسی و قانونی مشکلات اور قید کی سزا سے بچنے کے لیے امریکہ کو ایران کے ساتھ ایک نئی اور تباہ کن جنگ میں جھونکنے کی کوشش کر رہے ہیں۔
عباس عراقچی نے الزام لگایا کہ اسرائیلی رہنما کو اس بات کی بلکل پرواہ نہیں ہے کہ اس کے نتائج خود اسرائیل یا امریکی صدر ڈونلڈ کے لیے کیا ہوں گے۔
انہوں نے ماضی کا حوالہ دیتے ہوئے کہا کہ پچھلی بار بھی جب آپ نے یہ دعویٰ کیا تھا کہ آپ کام تمام کرنے والے ہیں، تو ایران مزید مضبوط اور طاقتور ہو کر سامنے آیا تھا۔
ایرانی وزیرِ خارجہ نے اپنے پیغام کو مزید سخت بناتے ہوئے لکھا کہ اگر آپ اپنی قسمت دوبارہ آزمانا چاہتے ہیں تو ہم آپ کو خوش آمدید کہتے ہیں، لیکن اس بار بہت محتاط رہیں کیونکہ ہمارے پاس بھی کئی اہم اور نامکمل کام باقی ہیں، جنہیں پورا کیا جانا ہے۔
