ایک سینئر سیکیورٹی عہدیدار کا کہنا ہے کہ ایران نے دشمن کے خلاف ہمہ گیر، کثیر الجہتی اور جامع جنگ کی مکمل تیاری کر لی ہے۔
ایرانی خبررساں ادارے پریس ٹی وی کے مطابق ایک سینئر سیکیورٹی عہدیدار نے بتایا کہ جیسے جیسے کشیدگی بڑھ رہی ہے، ایران نے دشمن کے خلاف ہمہ گیر، کثیر الجہتی اور جامع جنگ کی تیاری کر لی ہے۔
سیکیورٹی ذرائع نے کہا کہ ملک نے کسی بھی دشمن کی جارحیت، قتل اور ٹارگٹ کلنگ کا بغیر کسی حد یا پابندی کے جواب دینے کا قطعی فیصلہ کر لیا ہے۔
انہوں نے کہا کہ ایرانی مسلح افواج اس خطے میں جارحین اور ان کے حامیوں کی پہنچ میں موجود مفادات اور اہداف کو پوری طاقت کے ساتھ کچلنے کے لیے مکمل طور پر تیار ہیں۔
عہدیدار کے مطابق ایران کا فیصلہ قطعی ہے اور کسی بھی تجدید شدہ فوجی جارحیت کا جواب ایسے ردعمل سے دیا جائے گا، جو پورے خطے میں جارحین اور ان کے حامیوں کے مفادات اور مقاصد کو نشانہ بنائے گا۔
عہدیدار نے مزید کہا کہ ایران کے نقطہ نظر سے، امریکہ اسرائیلی حکومت کے بغیر حملہ نہیں کرے گا اور اسرائیلی حکومت امریکہ کے بغیر حملہ نہیں کرے گی۔
عہدیدار کا کہنا تھا کہ امریکہ اور صیہونی حکومت کے واضح خطرات نے ایران کو ضروری دفاعی اقدامات اٹھانے کا قانونی اور اخلاقی لائسنس فراہم کر دیا ہے۔
