سعودی اتحاد نے حوثیوں کے اس دعوے کو سختی سے مسترد کر دیا ہے، جس میں کہا گیا تھا کہ مملکت نے شہری اجتماعات کو نشانہ بنانے کی دھمکی دی ہے۔ ترجمان نے اسے جھوٹا اور گمراہ کن پروپیگنڈا قرار دیا ہے۔
سعودی عرب کی زیر قیادت اتحاد کے ترجمان نے حوثیوں کے ان دعوؤں کو بے بنیاد اور من گھڑت قرار دے کر مسترد کر دیا ہے، جن میں کہا گیا تھا کہ مملکت نے قبائلی اور شہری اجتماعات کو نشانہ بنانے کی دھمکی دی ہے۔
جاری بیان میں ترجمان ترکی المالکی نے کہا کہ یہ دعوے عوامی رائے کو گمراہ کرنے اور حوثی ملیشیا کے بحرانوں سے توجہ ہٹانے کی ایک ناکام کوشش ہیں۔
انہوں نے مزید کہا کہ یمنی قبائل یمنی معاشرے کی تاریخ اور تانے بانے کا ایک لازمی اور مضبوط ستون ہیں اور وہ سعودی اور یمنی عوام کے درمیان مذہب، ہمسایه داری، تاریخ اور مشترکہ مقدر کے بندھنوں سے جڑے ہوئے ہیں۔
ترجمان کا کہنا تھا کہ دونوں عوام کے تعلقات اتنے گہرے ہیں کہ انہیں کسی بھی طرح کی غلط بیانی یا تفرقہ پیدا کرنے کی سازشوں کے ذریعے نقصان نہیں پہنچایا جا سکتا اور یہ رشتے ہر حال میں مضبوط رہیں گے۔
