کراچی کے علاقے پاک کالونی میں رینجرز اور ایس آئی یو پولیس نے مشترکہ آپریشن کرتے ہوئے فائرنگ کے تبادلے کے بعد 2 زخمی بھتہ خور ملزمان کو گرفتار کر لیا۔
کراچی کے علاقے پاک کالونی میں رینجرز اور ایس آئی یو پولیس نے بھتہ خوروں کے خلاف ایک مشترکہ آپریشن کیا، جس کے دوران فائرنگ کا تبادلہ ہوا اور 2 بھتہ خور ملزمان زخمی حالت میں گرفتار کر لیے گئے۔
رینجرز حکام کے مطابق گرفتار ملزمان کی شناخت جہانزادہ عرف سلیم اور فواد علی کے نام سے ہوئی ہے اور ملزمان کے قبضہ سے اسلحہ اور ایمونیشن برآمد کر لیا گیا ہے۔
ملزم جہانزادہ عرف سلیم نے فیضان اسٹیل کے مالک کو فتنہ الخوارج کے نام پر بھتے کے لیے دھمکیاں دی تھیں اور بھتہ نہ دینے پر سنگین نتائج کی دھمکیاں دینے کا مقدمہ تھانہ اورنگی میں درج ہے۔
رینجرز حکام نے مزید بتایا کہ گرفتار ملزم فواد علی کا تعلق نفاذ الاسلام عرف چاچا گروہ سے ہے اور یہ گروہ ماربل فیکٹری مالکان سے بھتہ طلب کرنے اور انکار پر فائرنگ کے واقعات میں ملوث رہا ہے۔
اس گروہ کا سرغنہ نفاذ الاسلام عرف چاچا اس سے قبل ایس آئی یو پولیس مقابلے میں ہلاک ہو چکا ہے۔ ملزم فواد علی بھتہ خوری کے علاوہ اسٹریٹ کرائم کی متعدد وارداتوں میں بھی ملوث رہا ہے۔
