سعودی اتحادی فورسز کے ترجمان نے اعلان کیا ہے کہ مملکت کے فضائی دفاعی نظام نے یمن کے حوثیوں کی طرف سے داغا گیا ایک بیلسٹک میزائل تباہ کر دیا۔
سعودی اتحادی فورسز کے ترجمان کے مطابق یمن کے حوثیوں کی جانب سے سعودی عرب کے مشرقی صوبے کی طرف داغے گئے ایک بیلسٹک میزائل کو فضا میں ہی تباہ کر دیا گیا۔
اس سے قبل سعودی سول ڈیفنس اتھارٹی نے مشرقی صوبے میں ممکنہ خطرے سے متعلق خبردار کرتے ہوئے رہائشیوں پر زور دیا تھا کہ وہ فوری طور پر قریب ترین محفوظ ترین جگہ پر پناہ لیں۔
یہ الرٹس حوثیوں کی جانب سے سعودی عرب کے ہوائی اڈوں، بندرگاہوں اور تیل کی تنصیبات پر حملوں کے سلسلوں کے دوران سامنے آئے تھے۔
اس کے ساتھ ہی اتھارٹی نے نجران صوبے میں بھی ایسا ہی الرٹ جاری کیا تھا۔ تاہم بعد میں سعودی سول ڈیفنس نے دونوں صوبوں میں خطرہ ٹل جانے کا اعلان کیا اور شہریوں کو خبردار کیا کہ میزائل یا ڈرون حملوں کی فلم بندی کرنے یا ان کی معلومات شیئر کرنے سے گریز کریں، کیونکہ ایسا کرنے والے افراد قانونی جوابدہی کے زمرے میں آئیں گے۔
