بالی ووڈ کے مشہور فلمساز، ہدایت کار اور اسکرین رائٹر سنجے گپتا 57 برس کی عمر میں انتقال کرگئے۔
بھارتی میڈیا رپورٹس کے مطابق سنجے گپتا کے انتقال کی خبر فلم فیئر اور بالی ووڈ ہنگامہ کی جانب سے دی گئی۔ ان کے اہل خانہ نے ابھی تک موت کی وجہ یا آخری رسومات کے بارے میں کوئی تفصیلات جاری نہیں کیں۔
سنجے گپتا کا شمار بالی ووڈ کے ان ہدایت کاروں میں ہوتا تھا جنہوں نے ایکشن، جرائم اور تھرلر فلموں کے ذریعے اپنی منفرد پہچان بنائی۔ ان کا فلمی سفر تین دہائیوں سے زیادہ عرصے پر محیط رہا۔ اس دوران انہوں نے کئی ایسی فلمیں بنائیں جنہیں شائقین نے پسند کیا اور جو ان کے کیریئر کی اہم فلموں میں شامل ہوئیں۔
انہوں نے 1994 میں فلم ’آتش‘ کے ذریعے ہدایت کاری کی دنیا میں قدم رکھا۔ اس فلم میں سنجے دت اور آدتیہ پنچولی نے مرکزی کردار ادا کیے تھے۔ پہلی فلم کے بعد انہوں نے مختلف موضوعات پر کام کیا اور خاص طور پر ایکشن اور کرائم فلموں میں اپنی الگ شناخت قائم کی۔
ان کی مشہور فلموں میں ’کانٹے‘، ’مسافر‘، ’زندہ‘، ’شو ٹ آؤٹ ایٹ لوکھنڈوالا‘ اور ’شو ٹ آؤٹ ایٹ واڈالا‘ شامل ہیں۔ 2002 میں ریلیز ہونے والی فلم ’کانٹے‘ کو ان کے فلمی کیریئر کی نمایاں کامیابیوں میں شمار کیا جاتا ہے۔ اس فلم نے انہیں بطور ہدایت کار مزید شہرت دلائی۔
سنجے گپتا نے صرف ایکشن فلموں تک خود کو محدود نہیں رکھا بلکہ مختلف انداز کی فلموں میں بھی کام کیا۔ 2015 میں انہوں نے ایشوریا رائے اور عرفان خان کی فلم ’جذبہ‘ کی ہدایت کاری کی۔ اس کے بعد 2017 میں ہریتھک روشن کی فلم ’قابل‘ بھی ان کے کریڈٹس میں شامل ہوئی۔
