کوئٹہ کی ہنہ جھیل شدید خشک سالی کا شکار ہو گئی، جس کے باعث جھیل کا بیشتر حصہ سوکھ گیا، واٹر اسپورٹس سمیت سیاحتی سرگرمیاں معطل ہو گئی ہیں۔
بلوچستان کے دارالحکومت کوئٹہ کے دلکش اور خوبصورت نواحی علاقے ہنہ میں واقع تاریخی ہنہ جھیل میں پانی کی سطح انتہائی خطرناک حد تک گر جانے سے شدید خشک سالی کے مناظر دیکھنے میں آ رہے ہیں۔
علاقے میں معمول سے کم بارشیں ہونے کی وجہ سے جھیل کا بیشتر حصہ مکمل طور پر خشک ہو چکا ہے اور پانی کی نایابی کی وجہ سے جھیل میں موجود مچھلیاں مرنے لگی ہیں۔ اس سنگین صورتحال نے نہ صرف مقامی ماحولیات کو نقصان پہنچایا ہے، بلکہ اس تفریحی مقام کی رونقیں بھی ماند پڑ گئی ہیں۔
واٹر اسپورٹس اکیڈمی کے انچارج اور ماہرِ ماحولیات حیات اللہ دورانی کے مطابق جھیل کے خشک ہونے سے یہاں ہونے والی تمام واٹر اسپورٹس کی سرگرمیاں مکمل طور پر معطل کر دی گئی ہیں۔
انہوں نے مزید بتایا کہ جھیل کی اس تباہ حال صورتحال کی وجہ سے یہاں انے والے مقامی سیاحوں کی آمد بھی شدید متاثر ہوئی ہے جبکہ موسمِ سرما میں دوسرے ممالک اور علاقوں سے انے والے مہمان آبی پرندوں کی آمد پر بھی انتہائی منفی اثر پڑا ہے۔ سیاحتی اور ماحولیاتی حلقوں نے اس صورتحال پر گہری تشویش کا اظہار کیا ہے۔
