سابق چیف آف آرمی اسٹاف جنرل (ر) عبدالوحید کاکڑ راولپنڈی میں انتقال کر گئے، جس پر عسکری و سیاسی قیادت نے خراجِ تحسین پیش کرتے ہوئے گہرے دکھ کا اظہار کیا ہے۔
پاک فوج کے شعبہ تعلقات عامہ کے مطابق فیلڈ مارشل سید عاصم منیر اور پاک فوج کے تمام رینکس نے سابق چیف آف آرمی اسٹاف جنرل (ر) عبدالوحید کاکڑ کے انتقال پر گہرے دکھ اور افسوس کا اظہار کیا ہے۔
عسکری قیادت نے مرحوم جنرل کی شاندار ملٹری سروسز، قیادت اور پاک فوج کے لیے دی گئی غیر معمولی خدمات کو زبردست الفاظ میں خراجِ تحسین پیش کیا ہے۔
دوسری جانب صدرِ مملکت آصف علی زرداری اور وزیراعظم محمد شہباز شریف نے بھی سابق آرمی چیف کے انتقال پر ان کے اہل خانہ سے دلی تعزیت اور ہمدردی کا اظہار کیا ہے۔
صدر مملکت نے مرحوم کے لیے دعائے مغفرت کرتے ہوئے لواحقین کے لیے صبرِ جمیل کی دعا کی جبکہ وزیراعظم نے اپنے بیان میں کہا کہ جنرل (ر) عبدالوحید کاکڑ کی ملک اور پاک فوج کے لیے خدمات کو ہمیشہ یاد رکھا جائے گا۔ پاک فوج اور اعلیٰ حکام نے دعا کی ہے کہ اللہ تعالیٰ مرحوم کو جوارِ رحمت میں اعلیٰ مقام عطا فرمائے۔
