بلوچستان کے ضلع کیچ میں سیکیورٹی فورسز نے کارروائی کرتے ہوئے فتنہ الہندوستان کا ایک دہشت گرد جہنم واصل کر دیا۔
سیکیورٹی ذرائع کے مطابق بلوچستان کے ضلع کیچ کے علاقے بولیدہ کے موضع میناز میں فورسز نے انٹیلی جنس معلومات کی بنیاد پر فتنہ الہندوستان کے خلاف آپریشن کیا، ذرائع نے بتایا کہ دہشت گردوں نے 2 خواتین کو زبردستی اپنے ہمراہ لے جاتے ہوئے ناکہ بندی کرنے کی کوشش کی۔
سیکیورٹی فورسز نے فوری اقدام کرتے ہوئے فرار ہونے والے دہشت گردوں کا تعاقب کیا، جس کے بعد فائرنگ کے شدید تبادلے میں فتنہ الہندوستان کا ایک دہشت گرد ہلاک ہو گیا۔
ہلاک ہونے والے دہشت گرد کے قبضے سے بھاری مقدار میں اسلحہ اور گولہ بارود بھی برآمد کر لیا گیا ہے۔ سیکیورٹی فورسز نے علاقے میں ممکنہ طور پر چھپے دیگر دہشت گردوں کے خاتمے کے لیے کلیئرنس آپریشن شروع کر دیا ہے۔
