پنڈی بھٹیاں کے قریب ڈرائیور کو نیند آنے کے باعث مسافر بس سیم نالے کے پل سے نیچے جا گری، جس کے نتیجے میں 5 افراد جاں بحق ہو گئے۔
پنڈی بھٹیاں کے قریب سیم نالے کے پل پر لاہور سے چنیوٹ جانے والی تیز رفتار مسافر بس کا ڈرائیور دورانِ ڈرائیونگ نیند کا جھونکا آنے کی وجہ سے بس پر سے کنٹرول کھو بیٹھا، جس کے بعد بے قابو مسافر بس پل کی سائیڈ توڑتے ہوئے گہرے سیم نالے میں جا گری۔
حادثے کے نتیجے میں 5 افراد موقع پر ہی جاں بحق ہو گئے، جبکہ متعدد دیگر مسافر شدید زخمی ہو گئے۔ واقعے کی اطلاع ملتے ہی ریسکیو 1122 کی ٹیمیں ایمبولینسز موقع پر پہنچ گئیں اور نالے سے جاں بحق و زخمی افراد کو نکالنے کا کام شروع کیا۔
ریسکیو اہلکاروں نے زخمیوں کو موقع پر ابتدائی طبی امداد فراہم کرنے کے بعد تحصیل ہیڈکوارٹر اسپتال پنڈی بھٹیاں منتقل کر دیا، جہاں ان کا علاج جاری ہے۔
