اوکاڑہ میں مین جی ٹی روڈ پر ٹرک کی ٹکر سے 5 ہزار لیٹر پیٹرول اور ڈیزل سے بھرا آئل ٹینکر الٹ گیا، جس کے نتیجے میں 2 افراد زخمی ہو گئے۔
اوکاڑہ میں مین جی ٹی روڈ پر کسان اڈہ کے قریب بابا فرید ٹرک ٹرمینل کے نزدیک تیز رفتار ٹرک نے آئل ٹینکر کو ٹکر مار دی، جس سے ہزاروں لیٹر ایندھن سے بھرا ٹینکر سڑک پر الٹ گیا۔
حادثے کے نتیجے میں ٹینکر میں سوار 2 افراد زخمی ہو گئے، جن کی شناخت 20 سالہ احمد علی ولد امجد علی اور 22 سالہ محمد حسن ولد اسلم کے ناموں سے ہوئی ہے۔
ریسکیو اہلکاروں نے موقع پر پہنچ کر دونوں زخمیوں کو ابتدائی طبی امداد فراہم کی۔ ٹینکر میں 5 ہزار لیٹر پیٹرول اور ڈیزل موجود تھا، جو سڑک پر پھیلنے سے علاقے میں آتش زدگی کا شدید خطرہ پیدا ہو گیا۔
ریسکیو 1122، موٹروے پولیس اور مقامی پولیس نے فوری طور پر علاقے کو حصار میں لے لیا اور مٹی ڈال کر سڑک پر پھیلے ایندھن کو ڈھانپ دیا تاکہ ممکنہ آگ کے خطرے کو ختم کیا جا سکے۔
