سری لنکا نے گال کے قریب سمندر میں پھنسے ہوئے مال بردار جہازوں سے نکالے گئے 40 ایرانی ملاحوں کو طبی امداد فراہم کرنے کے بعد بحفاظت ایران روانہ کر دیا۔
سری لنکا کے وزیر خارجہ وجیتا ہیراتھ نے میڈیا کو بتایا کہ گال کے ساحل سے دور پھنسے ہوئے تجارتی جہازوں سے لائے گئے تمام 40 ملاحوں کو ملک میں طبی سہولیات فراہم کی گئیں، جن کے بعد وہ ہفتے کی صبح ایران کے لیے روانہ ہو گئے۔
وزارت خارجہ کے مطابق یہ ملاح بندرگاہ گال سے چوبیس سمندری میل کے فاصلے پر موجود تجارتی جہازوں پر سوار تھے، ان کی صحت بگڑنے پر سمندری حکام کو ہنگامی کال موصول ہوئی۔
کولمبو میں موجود ایرانی سفارت خانے نے ان ملاحوں کی وطن واپسی کے لیے بندوبست کیا جبکہ سری لنکن حکام نے گال کی بندرگاہ کے ذریعے ان کی محفوظ منتقلی کو یقینی بنایا۔ وزارت کے ترجمان نے کہا کہ ہم نے اپنے انسانی ہمدردی کے فرائض انجام دیتے ہوئے اس تبادلے کو مربوط کیا۔
دوسری جانب امریکی بحری ناکہ بندی کی وجہ سے تیل کے حامل تقریبا ایک درجن خالی ایرانی ٹینکرز ابھی تک گال کے قریب لنگر انداز ہیں اور ایران واپس جانے سے قاصر ہیں۔
یاد رہے کہ اس سے قبل مارچ میں بھی سری لنکا کے قریب امریکی فوجی حملے میں ایک ایرانی جنگی جہاز کے عملے کے ارکان ہلاک اور زخمی ہوئے تھے، جنہیں مقامی اسپتال منتقل کیا گیا تھا۔
