بلوچستان سے تعلق رکھنے والے پاکستان کے باصلاحیت فائٹر شیر باز مری نے قازقستان میں نومیڈ ایم ایم اے چیمپئن شپ میں گولڈ میڈل جیت کر عالمی سطح پر ملک کا نام روشن کر دیا۔
قازقستان میں منعقد ہونے والی نومیڈ ایم ایم اے چیمپئن شپ میں پاکستانی کھلاڑیوں نے شاندار کارکردگی کا مظاہرہ کرتے ہوئے دنیا بھر میں پاکستان پرچم بلند کیا ہے۔ بلوچستان سے تعلق رکھنے والے قومی فائٹر شیر باز مری نے اپنے حریف کو شکست دے کر گولڈ میڈل اپنے نام کیا۔
اس شاندار کامیابی پر شیر باز مری نے تمام مقابلوں کے دوران بھرپور معاونت فراہم کرنے پر حکومتِ بلوچستان اور پاکستانی قوم کا شکریہ ادا کیا ہے۔
اس عالمی مقابلے میں پاکستان کی ٹیم نے مجموعی طور پر بہترین کارکردگی دکھائی اور ٹورنامنٹ میں دوسری پوزیشن حاصل کی۔ پاکستان نے اس چیمپئن شپ میں مجموعی طور پر 4 گولڈ میڈل اور 3 کانسی کے تمغے حاصل کیے ہیں۔
عسکری و کھیل کے ماہرین کا کہنا ہے کہ ہمارے کھلاڑیوں کی یہ کارکردگی ثابت کرتی ہے کہ اگر نوجوانوں کو مناسب اور درست مواقع فراہم کیے جائیں تو وہ دنیا کی کسی بھی فیلڈ میں کامیابی حاصل کر سکتے ہیں۔
