معروف اینکر اقرار الحسن کے خلاف ریاست مخالف مواد کی تشہیر کے مقدمے میں وکیل صفائی نے جوڈیشل مجسٹریٹ شرقی کا فیصلہ سیشن عدالت میں چیلنج کر دیا۔
اینکر اقرار الحسن کے خلاف ریاست مخالف مواد کی تشہیر کے مقدمے میں اہم پیش رفت سامنے آئی ہے۔ وکیل صفائی نے جوڈیشل مجسٹریٹ شرقی کی جانب سے درخواست ضمانت مسترد کیے جانے کے فیصلے کو سیشن عدالت میں چیلنج کر دیا ہے۔
وکیل صفائی کا مؤقف ہے کہ این سی سی آئی اے نے اقرار الحسن پر صرف عمومی نوعیت کے الزامات عائد کیے ہیں اور مقدمے میں کسی قسم کے قابل اعتراض مواد کی تفصیلی معلومات بھی فراہم نہیں کی گئیں۔
وکیل نے عدالت کو بتایا کہ اقرار الحسن نے بطور صحافی صرف گورنر راج اور ایمرجنسی سے متعلق اپنی رائے کا اظہار کیا تھا، لہذا شواہد کی جانچ کے لیے ان کی جسمانی کسٹڈی کی کوئی ضرورت نہیں ہے۔
یاد رہے کہ اقرار الحسن اس وقت سینٹرل جیل کراچی میں قید ہیں اور سیشن عدالت میں ان کی درخواست ضمانت پر سماعت جلد متوقع ہے۔
