کراچی کے علاقے ناظم آباد میں پولیس اہلکاروں نے مبینہ طور پر ڈاکو سمجھ کر فائرنگ کر کے سرینا موبائل مارکیٹ کے ایک تاجر کو شدید زخمی کر دیا۔
کراچی کے علاقے ناظم آباد میں پولیس اہلکاروں کی مبینہ لاپرواہی اور فائرنگ کے نتیجے میں موبائل کا تاجر شدید زخمی ہو گیا ہے۔
صدر کراچی موبائل اینڈ الیکٹرانک ڈیلرز ایسوسی ایشن محمد منہاج گلفام نے واقعے کی تصدیق کرتے ہوئے بتایا کہ فائرنگ سے زخمی ہونے والا شہری سرینا موبائل مارکیٹ میں موبائل فونز کا کاروبار کرتا ہے۔
فائرنگ کے بعد پولیس اہلکار زخمی تاجر کو علاج کے لیے اسپتال میں چھوڑ کر موقع سے فرار ہو گئے۔ زخمی تاجر اس وقت اسپتال میں زیرِ علاج ہے، جہاں اس کی حالت پر تشویش کا اظہار کیا جا رہا ہے۔
اس واقعے کے بعد کراچی کی تاجر برادری میں شدید غم و غصہ اور تشویش کی لہر دوڑ گئی ہے اور انہوں نے مبینہ فائرنگ کی سخت الفاظ میں مذمت کی ہے۔
تاجر رہنما محمد منہاج گلفام نے آئی جی سندھ سے مطالبہ کیا ہے کہ وہ اس واقعے کا فوری نوٹس لیں اور ذمہ دار پولیس اہلکاروں کی نشاندہی کر کے ان کے خلاف قانون کے مطابق سخت کارروائی کریں۔
