لاہور (جی ٹی وی نیوز اردو): پاکستان کرکٹ بورڈ (پی سی بی) نے صائم ایوب کو سہ ملکی سیریز کے بقیہ میچز کے لیے قومی ون ڈے اسکواڈ سے ریلیز کردیا، جبکہ ان کی جگہ صاحبزادہ فرحان کو ٹیم میں شامل کرلیا گیا ہے۔
پی سی بی کے مطابق صائم ایوب نے اپنی بیٹنگ فارم بہتر بنانے اور اعتماد بحال کرنے کے لیے ڈومیسٹک کرکٹ کھیلنے کی خواہش ظاہر کی تھی۔ ہیڈ کوچ سے گفتگو کے بعد انہوں نے اسکواڈ چھوڑ کر ڈومیسٹک کرکٹ کھیلنے کی درخواست دی، جسے ٹیم مینجمنٹ اور قومی سلیکشن کمیٹی نے منظور کرلیا۔
صائم ایوب کی اسکواڈ سے علیحدگی کے بعد صاحبزادہ فرحان کو قومی ون ڈے ٹیم میں شامل کیا گیا ہے۔ ان کی شمولیت سے ٹیم کو سہ ملکی سیریز کے آئندہ میچز کے لیے ایک اضافی آپشن دستیاب ہوگا۔
پاکستان نے سہ ملکی سیریز میں مسلسل تین کامیابیاں حاصل کرکے فائنل کے لیے کوالیفائی کرلیا ہے۔ قومی ٹیم کی اگلی آزمائش سری لنکا کے خلاف میچ ہے، جو سیریز کا پانچواں مقابلہ ہوگا۔
پاکستان اور سری لنکا کے درمیان یہ میچ قذافی اسٹیڈیم میں کھیلا جائے گا۔ قومی ٹیم کی توجہ اب سیریز کے بقیہ مقابلوں میں کارکردگی برقرار رکھنے اور فائنل سے قبل اپنی تیاری مکمل کرنے پر ہوگی۔
