امریکی شہر میامی سے تعلق رکھنے والے معروف فٹنس انفلوئنسر لیام فٹزجیرالڈ 29 برس کی عمر میں انتقال کر گئے۔
لیام فٹزجیرالڈ موٹرسائیکل کے ایک خوفناک حادثے میں شدید زخمی ہوئے تھے۔ ڈاکٹروں اور دیگر افراد کی جانب سے انہیں بچانے کی کوشش کی گئی، لیکن وہ جانبر نہ ہو سکے۔
لیام فٹزجیرالڈ کی اچانک موت کی خبر نے سوشل میڈیا پر ان کے مداحوں کو افسردہ کر دیا ہے۔ انسٹاگرام پر ان کے ایک ملین سے زائد فالوورز تھے۔ وہ فٹنس اور طرزِ زندگی سے متعلق ویڈیوز اور تصاویر شیئر کرنے کے باعث خاصے مقبول تھے۔
ان کی گرل فرینڈ جیمی لین رینالڈی نے ہفتہ 31 اکتوبر کو انسٹاگرام پر ایک پیغام کے ذریعے ان کے انتقال کی تصدیق کی۔ انہوں نے بتایا کہ لیام 30 اکتوبر کی رات تقریباً 2 بجے دنیا سے رخصت ہو گئے۔
جیمی لین رینالڈی نے اپنے پیغام میں گہرے دکھ کا اظہار کیا۔ ان کا کہنا تھا کہ اس نقصان کے درد کو الفاظ میں بیان کرنا ممکن نہیں۔ یہ وقت ان تمام لوگوں کے لیے بہت مشکل ہے جو لیام سے محبت کرتے تھے۔ انہوں نے یہ بھی بتایا کہ حادثے میں لیام کو شدید چوٹیں آئی تھیں اور انہیں بچانے کی پوری کوشش کی گئی، لیکن کامیابی نہ مل سکی۔
میامی میں مقیم لیام فٹزجیرالڈ فٹنس کوچ بھی تھے۔ وہ انسٹاگرام پر ورزش، فٹنس، فیشن، روزمرہ زندگی اور مالی معاملات سے متعلق مواد شیئر کرتے تھے۔ اس کے علاوہ وہ لوگوں کو انفرادی فٹنس ٹریننگ بھی فراہم کرتے تھے۔
