الیکشن کمیشن نے خیبر پختونخوا کے 12 قبائلی اضلاع کو چھوڑ کر دیگر اضلاع میں بلدیاتی انتخابات کروانے کا حکم جاری کردیا
الیکشن کمیشن آف پاکستان نے خیبر پختونخوا کے بلدیاتی انتخابات سے متعلق اپنا محفوظ فیصلہ سنا دیا ہے۔ حکم نامے میں الیکشن کمیشن نے خیبر پختونخوا میں بلدیاتی انتخابات کروانے کا حکم اور متعلقہ ونگ کو انتخابی شیڈول فوری طور پر پیش کرنے کی ہدایت کی ہے۔
الیکشن کمیشن کے فیصلے کے مطابق جن اضلاع میں حلقہ بندیاں مکمل ہو چکی ہیں، صرف وہیں بلدیاتی انتخابات منعقد کروائے جائیں گے۔
الیکشن کمیشن نے واضح کیا ہے کہ خیبر پختونخوا کے 12 قبائلی اضلاع میں حدبندی اور بلدیاتی انتخابات فی الحال نہیں ہوں گے، جبکہ جن اضلاع میں حدبندی کا عمل مکمل نہیں ہوا ہے، وہاں حلقہ بندیوں کا شیڈول جاری کرنے کا حکم دے دیا گیا ہے۔
