کراچی (جی ٹی وی نیوز اردو): پاکستان میں طرزِ حکمرانی بہتر بنانے، انتظامی کارکردگی مؤثر کرنے اور وسائل کی منصفانہ تقسیم یقینی بنانے کے لیے ملک میں صوبوں کی تعداد چار سے بڑھا کر 12 کرنے کی تجویز پر اعلیٰ سیاسی و انتظامی سطح پر غور شروع ہو گیا ہے۔
مجوزہ منصوبے میں 28ویں آئینی ترمیم سے قبل ملک گیر ریفرنڈم کرانے کی تجویز بھی شامل ہے، جس کے ذریعے نئے صوبوں کے قیام پر عوام کی براہ راست رائے حاصل کی جا سکے گی۔
ذرائع کے مطابق مجوزہ آئینی ترمیم 2027 کے پہلے چھ ماہ میں لانے اور اس سے متعلق ابتدائی اقدامات اسی سال کی پہلی سہ ماہی سے شروع کرنے کا تصور پیش کیا گیا ہے۔ اس منصوبے کا بنیادی مقصد حکومتی اختیارات کو صوبائی دارالحکومتوں تک محدود رکھنے کے بجائے نچلی سطح پر منتقل کرنا اور انتظامی امور کو عوام کی دہلیز تک پہنچانا ہے۔
زیرِ غور انتظامی فریم ورک کے تحت پنجاب کو چار، خیبر پختونخوا کو تین، بلوچستان کو تین اور سندھ کو دو صوبوں میں تقسیم کرنے پر تبادلہ خیال کیا جا رہا ہے۔
تاہم حکام کے مطابق یہ تجویز ابھی ابتدائی مشاورت کے مرحلے میں ہے اور نئی انتظامی اکائیوں کی جغرافیائی حدود سمیت آئینی طریقہ کار کے مختلف پہلوؤں پر حتمی فیصلہ ہونا باقی ہے۔
مجوزہ منصوبے میں آئینی ترمیم سے پہلے ملک گیر ریفرنڈم کو اہم جزو قرار دیا جا رہا ہے، تاکہ عوام نئے صوبوں کے قیام کے معاملے پر براہ راست اپنی رائے دے سکیں۔ اس تجویز کا مقصد معاملے کو صرف سیاسی جماعتوں کے مفادات یا پارلیمانی جوڑ توڑ تک محدود رکھنے کے بجائے عوامی رائے کی بنیاد پر آگے بڑھانا بتایا گیا ہے۔
اس معاملے پر سیاسی رہنماؤں کے بیانات بھی سامنے آئے ہیں۔ وفاقی وزیر دفاع خواجہ آصف نے سیالکوٹ میں میڈیا سے گفتگو کرتے ہوئے انتظامی بنیادوں پر نئے یونٹس کے قیام کی حمایت کی۔
ان کا کہنا تھا کہ اگر 12 انتظامی یونٹس بنانے کی تجویز ہے تو بنائے جا سکتے ہیں، تاہم ان کی تشکیل لسانی، نسلی یا سیاسی مفادات کے بجائے عوامی سہولت کو مدنظر رکھ کر ہونی چاہیے۔
خواجہ آصف نے وفاق سے صوبوں کو ملنے والے فنڈز کی تقسیم پر بھی تشویش ظاہر کی۔
ان کے مطابق وسائل صوبائی دارالحکومتوں تک محدود رہ جاتے ہیں، حالانکہ انہیں مقامی بلدیاتی اداروں تک پہنچنا چاہیے تاکہ عوام کو براہ راست فائدہ ہو۔
سابق وفاقی وزیر اطلاعات محمد علی درانی نے اوچ شریف میں میڈیا سے گفتگو کرتے ہوئے بہاولپور اور ہزارہ کو فوری طور پر نئے صوبے بنانے کا مطالبہ کیا اور بہاولپور سے ملک گیر مہم شروع کرنے کا اعلان کیا۔
پاکستان مسلم لیگ (ن) کے رہنما اور وزیر مملکت حذیفہ رحمان نے کہا کہ ان کی جماعت کا مؤقف ہے کہ اس معاملے کو پارلیمنٹ میں پیش کرکے جامع بحث اور اتفاق رائے پیدا کیا جانا چاہیے۔
دوسری جانب پاکستان تحریک انصاف کے رہنما سلیم تیمور جھگڑا نے الزام عائد کیا کہ مسلم لیگ (ن) پنجاب میں اپنے اقتدار کے مرکز پر گرفت کم نہیں کرنا چاہتی۔
حکومت سندھ کی ترجمان سعدیہ جاوید نے واضح کیا کہ پاکستان پیپلز پارٹی کسی ریفرنڈم کی حمایت نہیں کرے گی۔
ان کے مطابق نئے صوبوں کے قیام کے لیے آئین میں درج طریقہ کار کے مطابق ہی پیش رفت ہونی چاہیے۔ یوں مجوزہ انتظامی تبدیلیوں پر سیاسی جماعتوں کے درمیان اتفاق رائے کا حصول ایک اہم مرحلہ دکھائی دیتا ہے۔
