قومی شناختی کارڈ بنوانے کے خواہش مند ایسے نوجوانوں کیلئے اہم خبر سامنے آئی ہے جن کے پاس ب فارم یا پیدائشی سرٹیفکیٹ موجود نہیں۔
نیشنل ڈیٹا بیس اینڈ رجسٹریشن اتھارٹی (نادرا) نے پہلی مرتبہ شناختی کارڈ بنوانے کے حوالے سے طریقہ کار واضح کردیا ہے۔ اب شہری اپنی دستاویزات کی صورتحال کے مطابق شناختی کارڈ کے حصول کیلئے درخواست دے سکتے ہیں۔
پاکستان میں 18 سال کی عمر مکمل ہونے کے بعد ہر شہری کیلئے قومی شناختی کارڈ بنوانا ضروری ہوتا ہے۔ تاہم بہت سے نوجوان ایسے ہیں جن کا ب فارم نہیں بنا ہوتا۔ بعض افراد کے پاس پیدائش کا سرٹیفکیٹ موجود نہیں ہوتا۔ اس وجہ سے انہیں شناختی کارڈ بنوانے کے دوران مشکلات کا سامنا کرنا پڑتا ہے۔ خاص طور پر ایسے نوجوانوں کو پریشانی ہوتی ہے جو پہلی مرتبہ نادرا کے دفتر جاتے ہیں اور انہیں معلوم نہیں ہوتا کہ کون سی دستاویزات درکار ہوں گی۔
اس حوالے سے نادرا کے ترجمان سید شباہت علی نے نادرا پوڈکاسٹ میں شہریوں کو اہم معلومات فراہم کی ہیں۔ انہوں نے وضاحت کی کہ پہلی مرتبہ کمپیوٹرائزڈ قومی شناختی کارڈ بنوانے کیلئے ہر شخص کی دستاویزات کی صورتحال مختلف ہوسکتی ہے۔ اسی بنیاد پر درخواست دینے کا طریقہ بھی طے ہوگا۔
نادرا ترجمان کے مطابق جن افراد کی پیدائش کا اندراج متعلقہ ادارے میں موجود ہے اور ان کے پاس پیدائشی سرٹیفکیٹ بھی ہے، لیکن انہوں نے اپنا ب فارم نہیں بنوایا، تو انہیں پریشان ہونے کی ضرورت نہیں۔ ایسے افراد 18 سال کی عمر مکمل ہونے کے بعد براہ راست قومی شناختی کارڈ کیلئے درخواست دے سکتے ہیں۔
اس عمل کیلئے پیدائشی سرٹیفکیٹ کی اصل دستاویز ساتھ لے جانا لازمی نہیں ہے۔ تاہم درخواست گزار کو اپنے پیدائشی سرٹیفکیٹ کا رجسٹریشن نمبر معلوم ہونا چاہیے۔ اس نمبر کی مدد سے نادرا متعلقہ ریکارڈ کی جانچ اور تصدیق کرسکتا ہے۔ اس طرح ب فارم نہ ہونے کے باوجود شناختی کارڈ بنوانے کا عمل ممکن ہوسکتا ہے۔
